Numerasaun Koreanu: Esplikasaun Simples kona ba Sistema Sino-Koreanu no Nativu Koreanu

Graphic by Jaciello

Dalan Simples: Hatene Diferente entre Sistema Numerasaun Sino-Koreanu no Numerasaun Nativu Koreanu

FAHE HO ITA - Lian Koreia lian úniku tebes tanba uza sistema númeru rua ne'ebé diferente: sistema Sino-Koreanu (China-Korea) no sistema Nativu Koreanu ka sistema Nasional. Iha konteudu artigu ida-ne'e fornese matadalan ida-ne'ebé simples no kompreensivu oinsa komprende sistema hirak-ne'e, kona ba sira-nia utilizasaun no diferensa.

Bainhira ita aprende kona-ba sistema númeru sira-ne'e, importante atu hanoin hetan katak prátika beibeik hakerek no konta uja númeru sira ne'e loron-loron mak bele ajuda melhora kompriensaun no utilizasaun ita nian ba sistema rua ne'e.

Númeru Sino-Koreanu (China-Korea)

Númeru Sino-Koreanu mai husi karaktere China no uja barak liu hodi hateten kona ba númeru telefone, númeru hela fatin, tinan, fulan, minutu ho segundu sira, presu, númeru dirasaun transporte, sukat áas, todan, númeru uma andar, númeru kuartu, númeru edifisiu, grau eskola, pursentu sira, temperatura, no uja ba númeru sira ne’ebé aás liu númeru 99 (sianulu resin sia). Observa didiak númeru Sino-Koreanu iha tabela tuir mai:

Sino Koreanu	Tetum
일 (il)	Ida (1)
이 (i)	Rua (2)
삼 (sam)	Tolu (3)
사 (sa)	Haát (4)
오 (ò)	Lima (5)
육 (yuk)	Ne’en (6)
칠 (chil)	Hitu (7)
팔 (pal)	Ualu (8)
구 (gu)	Sia (9)
십 (sib)	Sanulu (10)
이십 (isib)	Ruanulu (20)
백 (baek)	Atus ida (100)
천 (cheon)	Rihun ida (1000)
만 (man)	Rihun sanulu (10,000)

Iha sistema sura no hakerek númeru Sino-Koreanu hanesan mós sistem sura númeru Romanu maibé nia mekanizmu no forma karaktere maka diferente iha ne’ebé númeru sira sempre hakerek ho kompletu, observa ezemplu sira tuir mai ne’e:

1. Númeru sanulu resin ida (11), hakerek uluk 10 + 1 → 십 + 일 = 십일, nune’e kontinua to’o sanulu resin sia (19).
2. Númeru 20 (ruanulu), hakerek uluk 2 + 10 → 이 + 십 = 이십, forma hanesan kontinua uja to’o númeru sianulu resin sia (99)
3. Númeru 101(atus ida resin ida), hakerek uluk 100 + 1 → 백 + 일 = 백일, nune’e kontinua to’o 109 (atus ida resin sia).
4. Númeru 110 (atus ida resin sanulu), hakerek uluk 100 + 10 → 백 + 십 = 백십, mekanizmu ne’e uja kontinua ba númeru sira tuir mai.
5. Númeru 1900 (rihun ida atus sia), hakerek uluk 1000 + 900  → 천 + 구백 = 천구백, forma hanesan kontinua aplika ba númeru sira tuir mai.

Iha forma hakerek númeru sira iha leten, identifika katak sistema forma karaktere númeru Koreanu diferente ho sistema Romanu, tamba númeru sira lá hakerek uja simbolu digitu maibé hakerek uja karaktere.

Númeru Nativu Koreanu (Orginal)

Númeru Nativu Koreanu nudar númerasaun orijem Korea nian ne’ebé hakerek no lee uja lian Korea. Númeru orijem ne’e sura to’o 99 (sianulu resin sia), kuandu kontinua sura bá oin uja ona númeru Sino-Koreanu.

Númeru Nativu Koreanu uja generalmente hodi sura, hanesan sura objetu, sura tinan, sura ema, hateten oras no seluk tán.

Númeru Nativu Koreanu 1 ~ 9

Númeru Nativu Koreanu hakerek diferensa ho numeru sino-Koreanu komesa husi numeru 1 (ida) to'o numeru 9 (sia) hanesan iha tabela tuir mai:

Nativu Koreanu	Tetum
하나 [ha-na]	Ida (1)
둘 [dul]	Rua (2)
셋 [set]	Tolu (3)
넷 [net]	Haát (4)
다섯 [da-seot]	Lima (5)
여섯 [yeo-seot]	Ne’en (6)
일곱 [il-gop]	Hitu (7)
여덟 [yeo-deol]	Ualu (8)
아홉 [a-hop]	Sia (9)
열 [yeol]	Sanulu (10)

 

Agora ita hatene ona númeru Nativu Koreanu husi ida (1) to’o sanulu (10) iha table leten, atu sura kontinua ba to’o 19 (sanulu resin sia) fasíl tebes hanesan iha mekanizmu sura númeru Sino-Koreanu nian, ezemplu bainhira atu sura 11 (sanulu resin ida) forma deit numeru 10 + 1 → 열 + 하나 = 열하나 (11), kontinua nune’e to’o númeru 19 (sanulu resin sia).

Númeru Nativu Koreanu 20 ~ 99

Iha sistema númerasaun orijen Korea nian bainhira atu sura husi 20, 30, 40, 50, 60, 70, 80, no 90 uja liafuan espesiál seluk lá hanesan ho númerasaun Sino-Koreanu. Observa diferente iha tabela tuir mai.

Nativu Koreanu 20~90	Tetum
열 [yeol]	10 (sanulu)
스물 [seu-mul]	20 (rua nulu)
서른 [seo-reun]	30 (tolu nulu)
마흔 [ma-heun]	40 (haat nulu)
쉰 [swin]	50 (lima nulu)
예순 [ye-sun]	60 (neen nulu)
일흔 [il-heun]	70 (hitu nulu)
여든 [yeo-deun]	80 (ualu nulu)
아흔 [a-heun]	90 (sia nulu)

 

Agora ita hatene forma no diferente sira iha sistema númeru Nativu Koreanu nian, ita presija hatene mós oinsa sura númeru to’o 99 (sianulu resin sia). Bainhira atu temi númeru ruma forma de’it númeru sira iha leten hamutuk hanesan ita forma númeru iha sistema Sino-koreanu. Observa ezemplu sira tuir mai didiak:

1. Atu sura númeru 25, tau hamutuk 20 + 5 → 스물 + 다섯 = 스물다섯.
2. atu sura númeru 99, tau hamutuk 90 + 9 → 아흔 + 아홉 = 아흔아홉.

Ida ne'e maka esplikasaun simples kona ba oinsa hatene diferensa, oinsa uja, no oinsa forma karaktere iha sistema numerasaun Sino-Koreanu no sistema numerasaun Nativu Koreanu. Kompriende sistema númeru Sino-Koreanu no Nativu Koreanu nu'udar parte importante ida hodi domina lian Koreanu.

Imajina katak liu husi matadalan ida-ne'e, ita bele komprende didi'ak oinsa uza sistema rua ne'e ho efetivu. Iha mekanizmu barak ita estuda hodi aprende sura iha lian Koreanu depende ba ita ida-idak nia meios aprende, Kontinua prátika no keta ta'uk atu halo sala tamba sala sira ita halo mak parte iha prosesu aprendizajen nian.

Estuda Diak!

Link Interesante Seluk:

• Vocabulariu Lian Korea 100 uja Imajen

• Konversa Lian Korea Tradus Tetum-Ingles

• Maneira Lee Lian Korea

#FAHEHOITA #FAHETUTAN