HANGUL: Maneira Lee Lian Korea ho Di'ak

Graphic by Jaciello

Maneira atu lee lian Korea "Hangul" ho di'ak

Ita hakarak aprende maneira lee lian Korea?

FAHE HO ITA - Lian Korea ka ne'ebé koñesidu ho naran 'Hangul / Hangeul' (한글) iha forma karaktere no maneira lee ne'ebé la hanesan ho lian romano (romawi) ne'ebé ita uza loron-loron, ezemplu hanesan lian Tetum, no Ingles.

Tuir mai ne'e mak esplikasaun kona-ba oinsá atu lee lian Korea "Hangul"  letra konsoante.

Aprende lee no hakerek hangul nu'udar pasu dahuluk iha estudu lian Korea antes kontinua ba matéria tuirmai. Tanba se ita lá hatene letra ka karaktere sira Korea nia no maneira lee sira, ita sei susar atu lee lian Korea.

Letra Hangeul no nia Maneira Lee

Maneira lee letra Han-geul la hanesan ho maneira lee letra romano, hanesan iha lian Tetum ne'ebé iha som ida iha letra ida, tanba han-geul iha letra ida bele iha som rua ka liu bainhira lee husi pozisaun ne'ebé la hanesan.

Ezemplu, letra kiyôk [ㄱ] dala ruma lee "K" ka "G" depende pozisaun letra ne’e iha sílabas ida nia laran. Hanesan iha liafuan 가격 [kagyôk]=folin, ne’ebé ita haré letra kiyôk [ㄱ] iha 3 (tolu), kada letra iha pozisaun dahuluk, klaran, no ikus. Iha ne'e, ㄱ sei lee "K" bainhira nia iha pozisaun dahuluk no ikus, no ㄱ sei lee "G" bainhira nia pozisaun iha klaran. 👇Observa imagen tuir mai ne'e no koko rona lian Audio aneksu didiak .

Som sira lian konsoante

Maneira lee konsoante ida depende ba pozisaun iha sílabas nia laran

Leé	Konsoante	Dahuluk	Klaran	Ikus
kiyôk	ㄱ	k/g	g	k
nieun	ㄴ	n	n	n
digeut	ㄷ	t/d	d	t
rieul	ㄹ	r/l	r/l	l
mieum	ㅁ	m	m	m
bieup	ㅂ	p/b	b	p
siot	ㅅ	s	s	t
ieung	ㅇ	~	~	ng
cieut	ㅈ	c/j	j	t
chieut	ㅊ	ch	ch	t
khieuk	ㅋ	kh	kh	k
thieut	ㅌ	th	th	t
phieup	ㅍ	ph	ph	p
hieut	ㅎ	h	h/~	t/~

Espera katak guia ne’e benéfisiu ba ita hotu kona ba maneira aprende leé letra Korea ‘Hangul’. Fó hanoin katak atu domina lian ida presija tempu no pratika konsisténsia, buka nafatin materia sira aprende nian husi livru, aplikasaun telefone, ka tuir kursu lian Korea hodi profunda liután ita nia koinesmentu.

Sujestaun adisional balun oinsa melhora ita nia abilidade leé lian Korea:

• Le’e testu sira Korea nia bebeik hodi hatoman-an ho estrutura lian Korea nia nune’e ita sei familiar ho maneira leé ‘Hangul’.

• Prátika bebeik hakerek letra 'Hangul', hodi ita bele hanoin bebeik forma letra no maneira junta hamutuk letra sai sílabas/liafuan ida.

• Uja disionáriu lian Korea hodi buka signifika ba liafuan sira ne’ebé ita seidauk hatene.

• Husu ajuda ba belun sira seluk ka ema sira husi Korea hodi verifika ita nia pronúnsia no gramatika lian Korea nian.

✌️Happy learning Korean, aprende diak! 👌

LINK INTERESANTE SELUK:

• Korea - Tetum words with pictures

• Korea - Tetum - English Conversation

#FAHEHOITA #FAHETUTAN