VISA AUSTRÁLIA: Guia Oinsa Aplika via Online no Paper Application

Graphic by Jaciello

OINSA BELE APLIKA BA VISA AUSTRÁLIA NIAN IDA?

FAHE HO ITA - Guia ba etapa sira atu aplika ba visa Austrália nian ida bele liu husi online no liu husi formulariu/paper application iha Embaixada ka konsuladu besik iha ita bo’ot nia fatin.

Konteúdu artigu:

Oinsa atu aplika ba visa Austrália nian ida?
Etapa sira ba Aplikasaun visa Austrália via Online.
Etapa sira Aplikasaun visa Austrália iha Embaixada/paper application.
Bainhira maka ha’u tenki aplika ba visa Austrália nian ida?
Ema seluk bele aplika hela ha’u nia visa ka lae?
Oinsa dada fali ha’u nia visa aplikasaun?
Oinsa atu hatene katak ha’u simu ona visa Austrália nian ida?
Sekarik ha’u nia visa aplikasaun rejeita, presija halo saidá?
Antes submete visa aplikasaun, bele hola uluk tiketi aviaun ka lae?

Prosesu aplikasaun ba visa Austrália bele lalais ka tarde depende ba preparasaun ita bo'ot nian, esensial tebes hodi buka hatene lai kona ba tipu visa Austrália nian antes submete aplikasaun tamba, visa iha tipu oioin ne’ebé mai ho nia opsaun ba aplikasaun ne'ebé diferente, nune'e mós sei depende ba ita bo’ot nia nesesidade ka situasaun i nasionalidade.

Oinsa atu aplika ba visa Austrália nian ida?

Ita bo’ot bele aplika ba visa Austrália nian ida liu husi dalan 2 (rua) ne’ebé diferente:

Aplikasaun liu husi Online
Aplikasaun liu husi formuláriu/paper application.

Desde tinan 2015 Austrália para ona uja blanko/labels visa ba pasaporte sira, nune’e agora visa hotu-hotu guarda no emite liu husi servisu VEVO (Visa Entitlement Verification Online). Tempu agora, aplikasaun online maka asesíbel liu hodi guarda dadus hotu aplikante sira nian no permite prosesu verifikasaun lalais liu.

Maibé, ba nasaun seluk ne’ebé uja tipu visa diferente sei lábele uja formulariu aplikasaun online, nune’e tenki submete aplikasaun liu husi priense formulariu/paper application iha embaixada.

Ba kada tipu aplikasaun, iha guia spesífiku sira ne’ebé ita bo’ot tenki banati tuir bainhira hakarak atu aplika ba visa ida.

Etapa sira ba Aplikasaun visa Austrália via Online

Tuir mai etapa sira ne’ebé presija banati tuir bainhira atu aplika ba visa Austrália nian ida liu husi online:

Kria konta online ida.
Hili tipu visa.
Priense formuláriu visa Austrália.
Aneksu dokumentu nesesáriu sira.
Selu taxa ba aplikasaun.
Submete aplikasaun.

1) Kria konta online ida

Atu aplika ba visa Austrália liu husi online, ba dahuluk maka tenki loke konta individual ida online iha website ofisial Department of Home Affairs (ImmiAccount) Austrália nian. Konta ne’e sei loke ho gratuita, só presija deit maka ita bo’ot nia informasaun pesoal, kria password no konfirma ita bo’ot nia konta online liu husi verifikasaun email.

Servisu online sei ajuda ita bo’ot hodi maneija ita bo’ot nia aplikasaun, aneksu dokumentu sira no akompania nafatin hodi hatene kona ba prosesu verifikasaun visa ita bo’ot nian.

Iha mós opsaun atu loke konta ba organizasaun nian sekarik ita bo’ot aplika nudar:

Agente imigrasaun ne’ebé registu tiha ona.
Reprejenta organizasaun ida.
Kompañia sponsor.

Loke ita bo'ot nia online immi account iha ne'e: Create an ImmiAccount to access the Department of Home Affairs's online services.

2) Hili tipu visa

Visa Austrália iha tipu oioin ne’ebé ita bo’ot bele hili. Ida ne’e sei depende bá razaun ka objetivu ita bo’ot nian atu ba Austrália, ita bo’ot bele aplika ba visa turista, visa estudante, visa servisu no seluk tán.

3) Priense formuláriu visa Austrália.

Formulariu aplikasaun sei diferente ba kada tipu visa, bainhira hili tiha ona tipu visa ita bo’ot sei kontinua priense formuláriu. Ita bo’ot sei priense iha formuláriu informasaun pesoal sira hanesan naran, data moris, status, no seluk tán, rajaun tamba saidá hakarak ba Austrália, planu durasaun tempu iha Austrália, no seluk tán.

Sekarik ita bo’ot planu atu aplika hamutuk ho família no kolega, kada individual presija aplika ketak sira nian aplikasaun rasik.

4) Aneksu dokumentu nesesáriu sira.

Oinsa aneksu dokumentu sira ba aplikasaun liu husi online:

Hili opsaun “attach a document” hodi aneksu dokumentu ida.
Hili dokumentu ne’e ba sé /Select who you are attaching the document for.
Hili rajaun aneksu ho dokumentu ne’e/Select the reason why you are attaching this document.
Hili tipu dokumentu/Select the type of document.
Fó naran ba file/Name the file.
Klike butaun aneksu/click attach button.

Atu aneksu foto ida iha seksaun sira ketak-ketak, presija mak tenki hili opsaun hanesan “attach a passport photo” bainhira atu anesku foto. Haré kriteria ba foto iha ne’e >>Australia Visa Photo Requirements.

Dokumentu sira ne’ebé aneksu sei diferente tuir tipu visa mak ita bo’ot hili, haré iha ne’e detailu >> required documents for an Australian visa. Maibe, bá kriteria jeral inklui pasaporte, foto identidade, asuransia viagem, deklarasaun financial no seluk tán sei hanesan, atensaun hodi kopia digital/scanned koloridu dokumentu sira presija.

5) Selu taxa ba aplikasaun.

Taxa ba visa Austrália sei depende ba visa mak hili. Maibé, ita bo’ot tenki selu tiha lai taxa antes submete aplikasaun, selae ita bo’ot nia aplikasaun se lá-prosesa ba oin.

Ita bo’ot bele selu ba aplikasaun via online liu husi meios sira hanesan uja kartaun kréditu, debit card, ka Paypal.

6) Submete aplikasaun.

Bainhira ita bo’ot kompleta ona etapa sira anterior, agora bele submete ona aplikasaun.

Konta ImmiAccount sei fasilita ita bo’ot hodi kontaktu autoridade sira Australiano sekarik atu altera buat ruma ezemplu hanesan ita bo’ot troka hela fatin, bele komunika direta ho parte Department of Foreign Affairs liu husi ita bo’ot nia konta online.

Liu husi konta online ita bo’ot bele monitor prosesu aplikasaun, tamba tempu ba prosesu dala ruma diferente tuir tipu visa ne’ebé hili, nune’e, sekarik laiha obstaklu ruma iha aplikasaun ita bo’ot nian, visa sei emite tuir durasaun tempu ne’ebé determina.

Etapa sira Aplikasaun visa Austrália iha Embaixada/paper application.

Etapa sira presija banati tuir bainhira atu aplika visa Austrália iha embaixada hanesan tuir mai:

Vizita embaixada Austrália ka konsuladu.
Halo apontamentu ida ho agente iha embaixada ka konsuladu.
Verifika no prepara dokumentu nesesáriu sira.
Priense formuláriu aplikasaun.
Selu taxa ba aplikasaun.
Submete aplikasaun ba visa iha embaixada.

Bainhira formuláriu aplikasaun iha online lábele funsiona ita bo’ot bele submete aplikasaun iha embaixada liu husi priense paper application.

1) Vizita embaixada Austrália ka konsuladu.

Atu submete aplikasaun liu husi priense paper application ita bo’ot presija vizita embaixada ka konsuladu ne’ebé iha Dili, tamba paper application tenki submete ba edifisíu ne'ebé reprezenta Governu Australiano.

Tamba liu husi embaixada ka konsuladu, sira mós sei ajuda ita bo’ot hodi fasilita informasaun sira kona ba ba tipu visa no dokumentu sira oinsá mak tenki submete bainhira atu aplika.

2) Halo apontamentu ida ho agente iha embaixada ka konsuladu.

Ita bo’ot presija halo apontamentu ida ho agente visa nian liu husi email ka ba direta iha embaixada/konsuladu, tamba ida ne’e nudar prosesu dahuluk ne’ebé tenki halao bainhira atu trata aplikasaun ba visa Austrália.

Kuandu apontamentu konfirma ona, ita bo’ot bele prepara hodi aplika ba visa Austrália.

3) Verifika no prepara dokumentu nesesáriu sira.

Antes priense formulariu paper application ita bo’ot tenki verifika uluk dokumentu nesesáriu sira bazea ba lista ne’ebé defini husi parte agente visa nian hanesan pasaporte, sertifikadu família, asuránsia, formulariu aplikasaun visa no seluk tán.

Dokumentu sira ne’e tenki prepara hamutuk nune’e bele aneksu ba formuláriu aplikasaun, presija mós lori ho dokumentu orijinal bainhira atu submete aplikasaun tamba parte embaixada sei verifika antes simu ita bo’ot nia aplikasaun.

Ita bo’ot nia dokumentu só bele verifika husi agente hanesan:

Ema ida ne’ebé nia nasionalidade Austrália.
Ema ida ne’ebé nia nasionalidade hanesan ho aplikante.
Individual ida ne’ebé láiha relasaun ho ita bo’ot.
Individual ida ne’ebé servisu ba autoridade Austráliano.

Ema ne’ebé verifika ita bo’ot nia dokumentu sei fó deklarasaun iha pazina ida husi ita bo’ot nia aplikasaun katak dokumentu sira ne’ebé submete nudar kopia husi dokumentu orijinal ita bo’ot nian. Deklarasaun ne’e sei hakerek iha pazina dahuluk no sei tau mós asinatura iha kada pazina dokumentu aplikasaun nian.

4) Priense formuláriu aplikasaun.

Etapa tuir mai, ita bo’ot sei simu instrusaun oinsa priense formulariu paper application ba visa Austrália nian ho korektu no asina. Bainhira priense hotu ona aneksu ho dokumentu sira hodi kontinua ba prosesu tuir mai.

5) Selu taxa ba aplikasaun.

Ita bo’ot bele uja konta online hodi selu taxa ba aplikasaun, tamba prosesu selu taxa maka tenki uluk nune’e ita bo’ot komunika ho agente iha embaixada hodi hatene liu tán kona ba informasaun sira selu taxa nian, sekarik ita bo’ot laiha konta online ka prefere ho meius selu taxa ne’ebé diferente ba aplikasaun visa.

6) Submete aplikasaun ba visa iha embaixada.

Bainhira ita bo’ot selu tiha ona taxa no verifika tiha ona husi parte embaixada ita bo’ot bele submete ona dokumentu aplikasaun. Prosesu ba visa aplikasaun diferente ba kada aplikante, maibé presija atensaun katak aplikasaun liu husi embaixada/paper application dala barak lori tempu naruk hodi prosesa kompara ho aplikasaun liu husi online.

Bainhira maka ha’u tenki aplika ba visa Austrália nian ida?

Nudar rekomendasaun husi parte Department of Home Affairs katak aplikante sira tenki aplika ba visa fulan 4 (ha’at) antes sira nia data viajem. Tamba prosesamentu visa variavel depende ba fatór sira iha ne’ebé dala ruma bele lalais ka bele kleur liu, tamba ne’e aplika antes nudar opsaun diak.

Ema seluk bele aplika hela ha’u nia visa ka lae?

Ita bo’ot bele autoriza ema seluk hodi aplika hela ba visa. Maibé, ema ne’e só hala’o deit koordenasaun sira kona ba prosesu aplikasaun ba visa, ita bo’ot rasik mak sei priense formuláriu no asina.

Ita bo’ot bele aponta ema ruma liu husi konta online (ImmiAccount) ka bele priense formuláriu númeru 956A ba permisaun aponta ka hasai ema ne’ebé ita bo’ot fó autoriza, formulariu ne’e bele hetan iha ne’e Form 956A.

Oinsa dada fali ha’u nia visa aplikasaun?

Sekarik ita bo’ot nia aplikasaun ba visa seidauk hetan aprovasaun no ita bo’ot hakarak dada fali/kansela ita bo’ot tenki priense formulariu ba asuntu refere, bele hetan formulariu iha ne’e formulariu 1446

Sekarik ita bo’ot aplika ba visa liu husi online, aneksu ho formulariu refere, sekarik aplika iha embaixada/paper application ita bo’ot manda formulariu ne’e liu husi email ba autoridade relevante ne’ebé ita bo’ot submete aplikasaun bá.

Sekarik ita bo’ot nia aplikasaun ba visa prosesu lao tiha ona, sei lapermite atu dada fila-fali aplikasaun, maibé ita bo’ot bele aplika ba visa foun seluk ida.

Oinsa atu hatene katak ha’u simu ona visa Austrália nian ida?

Autoridade Australiano sei notifika ita bo’ot liu husi email ka karta bainhira ita bo’ot nia visa emite tiha ona. Sekarik ita bo’ot aplika ba visa liu husi online, bele monitor rasik status progresu aplikasaun ba visa, bainhira simu notifikasaun “finalised” signifika prosesu aplikasaun ba visa hotu ona no ita bo’ot sei simu rezultadu iha tempu badak.

Ba aplikasaun ne'ebé submete liu husi embaixada/paper application, ita bo’ot sei simu notifikasaun via email ka karta ruma husi parte autoridade embaixada ka konsuladu.

Sekarik ha’u nia visa aplikasaun rejeita, presija halo saidá?

Bainhira ita bo’ot nia aplikasaun hetan rejeita husi parte kompetente, ita bo’ot iha loron 28 (ruanulu resin uwalu) hodi hato’o reklamasaun kona ba kauja. Tempu ba reklamasaun depende ba tipu visa mak ita bo’ot aplika, tamba ne’e importante hodi hatene imformasaun sira ho klaru antes prepara karta reklamasaun.

Antes submete visa aplikasaun, bele hola uluk tiketi aviaun ka lae?

Lae, ita bo’ot labele hola tiketi aviaun bainhira prosesamentu ba visa aplikasaun ita bo’ot nian seidauk halao. Parte imigrasaun Australiano sei la responsabiliza ba gasta finansial ruma ne’ebé ita bo’ot iha relasiona ho aplikasaun ba visa, tamba dala ruma ita bo’ot nia aplikasaun rejeita ka emite latuir tempu ne’ebé ita bo’ot planu atu halo viajem, ita bo’ot só bele submete planu viajem nian ba parte autoridade nudar evidénsia kona ba rejervasaun viajem ita bo’ot nian sekarik sira husu.

ARTICLE RELEVANTE: